Urola Kostako Hitza

Begoña Garmendia Vazquez | 2007-12-05

"Beizamako udaleko Alkate eta Zinegotziok, 2007ko azaroaren 22an argitaraturiko berriaren aurrean, honako hau argitaratzea eskatzen diogu Urola-Kostako Hitza-ri, zuzenketa-eskubidea egikarituz: 1.- Argitaraturiko albistean, “Udal zergak kobratzen hasiko dira 2008an” eta “orain arte, ez da sekula zergarik kobratu Beizaman” aipatzen da. Baieztapen hauek ez datoz bat errealitatearekin, garbiago esanda, gezurrak dira. 2.- Orain arte, Beizamako herritarrek honako zerga hauek ordaintzen zituzten: hiri eta landalur kontribuzioak, Internet zerbitzua erabiltzeko prezioa, eta Obren gaineko zerga (%2a kasu guztietan). 3.- 2007ko maiatzean sartu ginen korporazio berriak, honako egoera hau egiaztatu genuen: - udaleko sarrera arruntak arautzeko ez zeudela irizpide garbiak. Honen ondorioz, - hainbat zerbitzuen mantenimendu-kosteak handiak zirela, batez ere ur-hornidura eta zabor-bilketako zerbitzuenak - edozein diru laguntza eskatzeko garaian, sarrera arruntekiko udalaren kudeaketa zalantzan jartzen zela. 4.- Egoera honen aurrean, eta herritar guztiak batzar batera deitu ondoren, honako planteamendua egin zuen korporazio berriak: - Ur-hornidura eta zabor-bilketako zerbitzuengatik tasa bat kobratzen hastea, hain zuzen, 10 € hiruhilabete bakoitzekoa (etxebizitzen kasuan) - Ibilgailuen gaineko zergari dagokionez, oinarrizko zerga kobratzea - Obren gaineko Zergaren kasuan, honako bonifikazio hauek indarrean sartzea: - a) Nekazari ustiaketetan, zergaren %90eko hobaria aplikatzea (ustiapenarekin lotuta dagoen etxebizitza barne) - b)Kultur ondare gisa sailkaturik dauden eraikuntzen kasuan, %50eko bonifikazioa. - Obra txikiak, kasu guztietan salbuestea 5.- Irizpide hauekin, honako helburu hauek lortu nahi genituen: - Jendeak kontzientzia hartzea zerbitzuen kostei buruz - Politika fiskal orekatua eta justuagoa aplikatzea - Herritarrak ez direnen iruzurrari muga bat jartzea (ikusgarria da Beizamako ibilgailuen flota, errealitatearekin bat ez datorrena). 6.- Neurri guzti hauek Udalbatza Plenoak hartu zituen herritarren batzarraren onespenarekin. Beraz, hurrengoan, Beizamari buruzko berriei, tratamendu orekatuagoa eta errealagoa ematea eskatzen dizuegu." Mesedez, argitaratu zuzenketa hau hurrengo Hitza-n. Eskerrik asko